Зголемените температури ќе го отежнат опстанокот на Земјата пред нејзиното крајно уништување. Целта на оваа студија била да се одреди точниот момент кога повеќето растенија и животни нема да можат да преживеат. Научниците се обиделе да утврдат кога животот ќе остане без воздух.
Според истражувањето, за околу милијарда години, како што Сонцето ќе станува потопло и ќе зрачи повеќе енергија, нивото на јаглерод диоксид (CO2) ќе почне да опаѓа. CO2 апсорбира топлина, но се распаѓа со текот на времето, а озонската обвивка ќе страда.
Бидејќи растенијата зависат од јаглерод диоксид за производство на храна, падот на нивото на јаглерод диоксид сериозно би го загрозил нивното постоење. Во рок од околу 10.000 години растителниот свет целосно би исчезнал. Без растенија, копнените и морските животни би се задушиле поради престанокот на производството на кислород. Зголемувањето на нивото на метан дополнително ќе го забрза истребувањето на организмите што дишат кислород.
На крајот, единствената форма на живот на Земјата што би останала се микроскопските бактерии на кои не им е потребен кислород за да преживеат – слични на оние што постоеле пред да се појават растенијата и животните. Така планетата би се вратила на својот микробиолошки почеток, затворајќи полн круг.
Според истражувачите, на атмосферата богата со кислород ѝ остануваат уште околу 1,08 милијарди години пред да се исцрпи. На пример, кислородот почнал да се акумулира во атмосферата пред 2,5 милијарди години за време на Големата оксидациска револуција. Дури пред околу 400 милиони години, кога се развиле копнените растенија, нивото на кислород се приближило до денешното и веројатно останало релативно ниско во поголемиот дел од историјата на Земјата. Врз основа на процените, Земјата ќе има површинска вода и ќе биде погодна за живот уште 7,2 милијарди години, но само 20 до 30 отсто од тоа време атмосферата ќе содржи високо ниво на кислород.
Откриен кислород во далечна галаксија
Ова прашање е важно и за потрагата по живот во вселената. Кога бараат други планети, научниците често бараат гасови како кислород и озон, како знаци на живот. Меѓутоа, кога телескопите би ја набљудувале Земјата пред две милијарди години или две милијарди години во иднината, тие нема да ги регистрирале овие гасови. Би можеле да заклучиме дека планетата е мртва и би можеле да го пропуштиме периодот кога имала атмосфера за дишење. Ова сугерира дека дури и населената планета може да има периоди кога изгледа безживотно – клучот е да се открие во вистинскиот момент.
Неодамна научниците откриле кислород во далечна галаксија. Студијата била спроведена од два истражувачки тима: едниот од Универзитетот „Скуола Нормале Супериоре“ во Пиза, Италија, а другиот од опсерваторијата „Лајден“ во Холандија. Според Европската јужна опсерваторија, младите галаксии најчесто се формираат од лесни елементи како водород и хелиум. Потешките елементи, вклучувајќи го и кислородот, се создаваат за време на еволуцијата на ѕвездите и се распрснуваат низ галаксијата по нивното уништување. Претходно научниците мислеле дека таква млада галаксија како „JADES-GS-z14-0“, стара само 300 милиони години, не може да содржи кислород, но ова откритие ги менува претходните претпоставки.
