Во пресрет на големиот христијански празник Петровден, во чест на светите апостоли Петар и Павле, фондацијата „Елеуса“ повторно ја покажа својата хуманост. Волонтерите на фондацијата деновиве ги подготвија и започнаа со дистрибуција на хуманитарни пакети со прехранбени производи, наменети за социјално загрозените семејства во Струмичката епархија.
Во рамки на оваа традиционална акција, која фондацијата ја спроведува секоја година, беа подготвени и доставени над 200 пакети директно до домовите на семејствата на кои им е најпотребна поддршка.
Фондацијата „Елеуса“ и овој пат потврди дека грижата за ближниот и практикувањето на христијанските вредности се столбови врз кои се темели нејзината мисија, да помогне таму каде што е најпотребно.
