Градоначалникот Коста Јаневски и претставници на Одделението за локален економски развој во општина Струмица, денеска, присуствуваа на информативниот состанок со претставници од Агенцијата за финансиска поддршка за земјоделството и руралниот развој во врска со најавениот Јавен повик за мерките 321, 322 и 323 од Програмата за финансиска поддршка на руралниот развој за 2018 година. На состанокот присуствуваа градоначалници и претставници на општините од Југоисточниот плански регион, а беа информирани за начинот на кој што ќе можат да се искористат планираните средства од оваа програма.
Од Агенцијата информираа дека од вкупно 2 милијарди и 132 милиони денари, над 600 милиони се наменети за општините. На десетте општини од регионот и на Центарот за развој на Југоисточниот плански регион им стојат на располагање средства по повеќе основи. Една од мерките е подобрување на животот во руралните средини, потоа мерката за обнова и развој на селата и мерката за зачувување и унапредување на традиционалните вредности во руралните подрачја.
Овие мерки се вклопуваат во целите на градоначалникот Коста Јаневски и општина Струмица и максимално ќе ги искористат овие можности за реализација на проекти кои ќе го подобрат животот на граѓаните во Општината.