Синоќа се затвори големата фест сцена на Струмица опен фестивал 2018. Градоначалникот Коста Јаневски, денеска, упати јавна благодарност до организаторите од Здружението „Културен – забавен живот“, за професионалноста на институциите кои беа задолжени за безбедноста и чистотата, а најмногу на граѓаните кои беа дел од седмиот СТРУМИЦА ОПЕН ФЕСТИВАЛ.
-Помина уште едно, седмо по ред издание, на најмасовната манифестација во нашиот град и општина, но и во цела Македонија, СТРУМИЦА ОПЕН ФЕСТИВАЛ. Радува тоа што реакциите на граѓаните од нашата и другите општини од нашава земја но и од странство, како преку непосредните контакти, така и преку социјалните мрежи, се повеќе од позитивни. Од тие реакции но и од согледувањето на фактичката состојба, може слободно да се заклучи дека годинава го имавме едно од најмасовните и најквалитетните изданија на СТРУМИЦА ОПЕН ФЕСТИВАЛ.
Ако на тоа се додаде фактот, дека за прв пат овој фестивал се одржа во текот на јули и август, понудувајќи им на граѓаните разнoвидни содржини за сечиј вкус, можеме да констатираме дека е направен значаен исчекор и во квалитет и во квантитет, со што истиот бележи евидентна нагорна линија. Задоволството е уште поголемо, што сите фестивалски денови поминаа без никакви проблеми или нарушување на јавниот ред и мир.
Поради сето тоа, сакам јавно да им честитам и да им се заблагодарам, како на организаторите од Здружението „Културен – забавен живот“, така и на сите институции кои беа задолжени за безбедноста и чистотата (за нивната професионалност и сериозност), а најмногу на граѓаните кои беа дел од Седмиот СТРУМИЦА ОПЕН ФЕСТИВАЛ.
Бидејќи, интенција на фестивалот е секое наредно издание да биде подобро од претходното, ветуваме дека Општина Струмица и јас како градоначалник, ќе вложиме максимални напори во севкупната негова поддршка, а за уште поголемо збогатување на содржините кои го разубавуваат животот на граѓаните, рече Јаневски.
