По повеќе од четири децении чекање, застои и неизвесност, новиот крак на ЈЗУ Општа болница Струмица и официјално преминува во сопственост на здравствената установа. Ова следува по потпишувањето на договорот со Министерството за здравство, со што се заокружува долгогодишен процес поврзан со статусот на објектот.

Станува збор за значаен чекор за струмичкото здравство, имајќи предвид дека објектот со децении не беше ставен во функција, а неговото долгогодишно пропаѓање претставуваше еден од нерешените проблеми во здравствената инфраструктура во регионот.

Со официјалното преземање на објектот се создаваат услови новиот болнички крак конечно да ја добие својата вистинска намена – обезбедување здравствени услуги за граѓаните на Струмица и поширокиот регион.

Според најавите од болницата, во краток период се очекува и официјално започнување со работа на новиот објект, како и прием на првите пациенти.

Со ова, по повеќе од 40 години, се отвора ново поглавје во развојот на Општа болница Струмица, со очекувања за подобрување на условите за лекување и унапредување на здравствената заштита на граѓаните.