Од ноќеска на полноќ, малопродажните цени на бензините ЕУРОСУПЕР БС-95 и ЕУРОСУПЕР БС-98, како и на Екстра лесното масло за домаќинство (ЕЛ-1), ќе бидат повисоки за 7 денари по литар. ЕУРОДИЗЕЛ (Д-Е V) ќе поскапи за 6,5 денари, согласно одлуката на Регулаторната комисија за енергетика и водни услуги (РКЕ).
Новата малопродажна цена на ЕУРОСУПЕР БС-95 ќе изнесува 86,5 денари за литар, додека ЕУРОСУПЕР БС-98 ќе се продава по 88,5 денари. Цената на ЕУРОДИЗЕЛ (Д-Е V) ќе достигне 92 денари, а на Екстра лесното масло за домаќинство (ЕЛ-1) ќе биде 89,5 денари.
Покрај тоа, цената на Мазутот М-1 НС исто така ќе се зголеми, за 4,867 денари, со што неговата нова цена по килограм ќе изнесува 47,453 денари.
Со оваа одлука на РКЕ, нафтените деривати во малопродажба се поскапи во просек за 8,98%, споредено со цените утврдени на 9 март годинава.
“Референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 16,964 проценти или за 136,750 $/тон, кај дизелот зголемувањето е во просек за 11,714 проценти или за 117,500 $/тон, кај екстра лесното масло зголемувањето е во просек за 13,059 проценти или за 123,950 $/тон и кај мазутот зголемување во просек за околу 14,591 проценти или за 72,400 $/тон, поради што во структурата на цените на нафтените деривати е извршено соодветно прилагодување.”
Курсот на денарот во однос на доларот во последниот период во просек изнесува 53,2915 денари за долар, што претставува зголемување од околу 0,8453% во споредба со претходниот курс од 52,8447 денари за долар, по кој беа формирани цените, наведува РКЕ во својата одлука.
