Струмичкиот кик-боксер Петре Велков продолжува да блеска на престижниот меѓународен турнир „WAKO World Cup Italy“, кој се одржува во Италија, откако денеска обезбеди пласман во големото финале.

По вчерашната победа во четвртфиналето против Heschemi Zahed од Швајцарија, Велков денеска триумфираше и во полуфиналниот меч, совладувајќи го кик-боксерот од Словенија, Гартнер Ерик. Со оваа значајна победа, тој се пласираше во финалето на овој силен меѓународен турнир и уште еднаш го потврди својот квалитет, борбеност и одлична подготвеност.

Со својот настап во Италија, Петре Велков достојно ги претставува Струмица, клубот К1 Арена и Македонија, испишувајќи уште една успешна страница во својата спортска кариера.

Утре Велков го очекува најважниот предизвик на турнирот – големото финале, каде ќе се бори против противник од Полска во обид да стигне до златниот медал и да заокружи уште еден голем меѓународен успех.