Со хуманост, емпатија и искрена посветеност, СОУ „Јане Сандански“ успешно ја заокружи хуманитарно-едукативната иницијатива „Новогодишна магија“, која остави силна и трајна порака за солидарност и заедништво.

Во рамки на иницијативата беа опфатени вкупно 175 стари лица и лица со посебни потреби, додека истовремено активно учество земаа и 175 ученици, со значајна поддршка и ангажман од вработените во училиштето.

Оваа активност претставуваше многу повеќе од обично дарување. Таа беше вистинска лекција за човечност и инклузија, во која учениците преку изработка на персонализирани подароци, споделување време и топол збор, покажаа дека емпатијата и почитта се вредности што се градат со личен пример.

Секоја реализирана средба носеше нова радост, а секоја насмевка беше потврда дека и најмалите гестови можат да создадат големи и значајни промени во општеството.

Од СОУ „Јане Сандански“ упатија искрена благодарност до сите ученици, наставници и вработени кои беа дел од оваа иницијатива и со својот ангажман придонесоа „Новогодишната магија“ да стане реалност.