Утре (сабота, 29 ноември) со почеток во 11:00 часот, на плоштадот „Магнолија“ во Битола ќе се одржи едукативно дружење посветено на националниот портал за електронски услуги uslugi.gov.mk.

Настанот има за цел да им ја доближи платформата на граѓаните и да им покаже како јавните услуги можат да се користат онлајн – брзо, едноставно и без чекање редици.

Граѓаните на Битола ќе имаат можност директно да се информираат за сите функционалности на порталот, а професионалци и претставници од Министерството за дигитална трансформација ќе бидат присутни за да ги упатат, да им помогнат околу процесот на регистрација и да демонстрираат практична употреба на електронските услуги.

На настанот се најавува присуство и на градоначалникот на Општина Битола и министерот за дигитална трансформација, кои преку директни разговори со граѓаните ќе ја истакнат важноста на дигитализацијата и подобрената достапност на јавните услуги. Ова е уште едно во низата едукативни дружења организирани низ државата, со кои Министерството за дигитална трансформација продолжува активно да работи на унапредување на дигиталните услуги и на поинтензивна, директна комуникација со јавноста.