Во рамки на денешниот регионален самит во Тирана, премиерот на Република Македонија, Христијан Мицкоски, ќе оствари значајна билатерална средба со британскиот премиер Кир Стармер. Очекувањата се дека токму на оваа средба ќе биде постигнат финален договор за воспоставување на стратешко партнерство меѓу двете држави.
Според информации од владини извори, договорот е резултат на интензивни и внимателни подготовки кои траеле неколку месеци, при што дипломатски и експертски тимови од Скопје и Лондон работеле на дефинирање на приоритетите и обемот на соработката. Документот се оценува како еден од најважните надворешнополитички чекори на Македонија во последните години.
Предвидено е партнерството да опфати широк спектар на области – од безбедносна и економска соработка, преку инвестиции и технолошки развој, до заеднички иницијативи за климатска акција и дигитална трансформација.
„Станува збор за чекор со кој Македонија добива сериозно засилување на својата меѓународна позиција, преку продлабочување на врските со една од водечките глобални сили“, истакнуваат од владини кругови.
Во рамките на договорот се очекува пристап до британско знаење и техничка поддршка во клучни реформски процеси, како и отворање на можности за директни инвестиции од британски компании во инфраструктура, енергетика и иновации. Освен тоа, договорот ќе овозможи зголемена политичка координација и заеднички активности во меѓународни форуми и безбедносни рамки.
Средбата меѓу Мицкоски и Стармер е прв официјален контакт на ова ниво меѓу двете земји по промената на британската влада, и се гледа како почеток на една нова фаза во меѓусебните односи.
Според најавите, деталите од договорот ќе бидат јавно објавени до крајот на денот, а во план е и формирање на заеднички комитет што ќе ја следи имплементацијата и ќе предлага дополнителни насоки за соработка.
