Научниците откриле дека средовечните луѓе кои генерално се чувствуваат добро може да имаат некои здравствени проблеми како што се висок крвен притисок, висок шеќер или висок холестерол.
Тие предупредуваат дека се повеќе луѓе имаат „метаболичен синдром“ кој без да го знаат тоа создава проблеми кои ќе се манифестираат подоцна во животот.
Многу луѓе во своите 40-ти и 50-ти имаат малку маснотии во стомакот и малку покачен крвен притисок, холестерол или гликоза, но генерално се чувствуваат добро и не се свесни за ризиците и не бараат лекарски совет, рече авторката на студијата Lena Lönnberg, од Västmanland County Hospital, Västerås, Sweden.
„Тоа сценарио, наречено метаболички синдром, е се поголем проблем кај западните популации каде луѓето, без да знаат, развиваат проблеми подоцна во животот.
Тие пропуштаат одлична можност да интервенираат пред срцеви и мозочни удари кои можеле да се избегнат.
Во истражувањето, претставено на конгресот на Европското здружение за кардиологија (ESC) во Амстердам, биле анализирани податоците на повеќе од 34.000 возрасни лица на возраст од 40 и 50 години од Шведска кои поминале низ програма за скрининг на срцеви заболувања во 1990-тите. Собрани се податоци за тежина, висина, крвен притисок, холестерол и шеќер во крвта и тие пополниле прашалник за животните навики.
Метаболичен синдром е откриен кај оние кои имале три или повеќе карактеристики: голем обем на половината, висок холестерол, висок крвен притисок или висок шеќер.
Во набљудуваната група, 5.000 испитаници биле оценети дека имаат метаболички синдром и нивните податоци биле споредени со 10.000 луѓе кои го немале. Тие биле следени во просек по 27 години. Во тој период умреле 26 отсто од луѓето со метаболички синдром, наспроти 19 отсто од оние кои не го имале.
Ова значи дека оние со метаболички синдром имале 30 проценти поголема веројатност да умрат во периодот на следење во споредба со оние кои го немале, објавија истражувачите.
Околу 32 отсто од испитаниците за кои се оценува дека имаат метаболички синдром доживеале фатален срцев удар или мозочен удар, во споредба со 22 отсто од оние без синдром, што одговара на 35 отсто ризик од срцев удар и мозочен удар кај оние со метаболички синдром.
Научниците заклучиле дека луѓето со метаболички синдром имаат поголема веројатност да доживеат срцев удар или мозочен удар 2,3 години порано од оние без него.
Бидејќи метаболичкиот синдром е збир на фактори на ризик, нивото на секоја поединечна компонента не мора да биде многу покачена. Всушност, повеќето луѓе живеат со само малку покачени нивоа многу години пред да развијат симптоми кои бараат од нив да побараат медицинска нега, рече д-р Lönnberg.
Најризичната компонента е крвниот притисок, особено за жените во 40-тите години, што ја нагласува потребата да се држи под контрола, додаде таа.
Резултатите ја нагласуваат важноста од рано откривање на факторите на ризик преку програми за скрининг на здравјето за да се преземат превентивни мерки за спречување на срцев и мозочен удар и прерана смрт, заклучи таа.
Општото правило, дури и ако се чувствувате добро, е да го проверувате крвниот притисок секоја година, да избегнувате пушење, да внимавате на половината и на крај, но секако не и најмалку важно, да бидете физички активни секој ден, рече таа.
