Македонскиот министер за внатрешни работи, Оливер Спасовски вчера изјави дека лани има зголемување за 31,22 отсто обиди за илегално преминување на границата, а спречени се 27.391 обиди за илегално преминување на границата.
Според него, тој тренд продолжил и во јануари годинава.
Спасовски и српскиот министер Братислав Гашиќ во средата го потпишаа Протоколот за начинот на вршење гранични контроли на заедничкиот граничен премин Лојане-Миратовац.
По тој повод, министрите посочија дека српската и македонската гранична служба традиционално добро соработуваат и дека потпишаниот Протокол „ќе придонесе за подетално регулирање на начинот на извршување на граничните проверки“ на заедничкиот граничен премин и „да направи соработката е посилна и поефикасна“.
„Србија и Македонија стојат на истиот пат за спречување на илегалната миграција. Нашата полиција покажа дека е сигурен партнер во борбата против илегалната миграција и борбата против прекуграничниот криминал“, рече Гашиќ.
Спасовски посочи дека безбедносната состојба на македонските државни граници е стабилна и без значителни промени.
„Сакам да изразам голема благодарност за придонесот на Министерството за внатрешни работи на Република Србија со испраќање полициски службеници кои учествуваат во заедничката операција на засилен надзор на јужната граница, што значително придонесува за зајакнување на капацитетите во борба против илегалната миграција.
Ова е од непроценливо значење за нашата земја, со оглед на притисокот со кој се соочуваме на јужната граница. Можам само да искажам пофални зборови за соработката со српските колеги, кои се присутни на нашата јужна граница и кои со своето искуство, знаење и воспоставени работни практики придонесуваат за развој на капацитетите на македонската гранична полиција“, рече Спасовски.
