Perdormire
Спорт

СТРУМИЧАНЕЦОТ КРИСТИЈАН ВОДЕНСКИ ВО ГЕРМАНИЈА ГО СПОРЕДУВААТ СО БРУС ЛИ!

Боречките спортови кај нас не се многу застапени, но не треба да се грижиме бидејќи Македонија има иднина и во овој спорт. Кристијан Воденски е млад борач кој живее во Германија, но секогаш настапува под македонско знаме. „Сакам македонско знаме да носам, македонска химна да слушам кога победувам“, изјави Кристијан и стопи многу македонски срца.

Има само 11 години, а веќе е огромна ѕвезда во Германија, па често пати германските медиуми пишуваат за него. Кристијан е шампион во неговата категорија во повеќе боречки спортови- борење, кик-бокс, бразилско џиу-џицу и теквондо. „Рајн Мајн екстра тип“ весникот напиша и цела сторија за Кристијан, кој инаку со своето семејство живее во Офенбах. Преставен е како еден од најголемите таленти за боречки вештини во Германија, а често го споредуваат и со легендарниот Брус Ли.

Најатрактивен дел од борбите на Кристијан е неговиот ротациски удар одзади со петица, со т.н Кикилорис техника.

Инаку, Кристијан има потекло од Струмица, па често пати доаѓа на одмор токму тука. Она што посебно заслужува почит е неговата љубов кон татковината. На неговиот Фејсбук профил секогаш пишува за љубовта која ја има кон Македонија, а како што вели, најтешко му е кога треба да си замине назад во Германија.