ОПШТИНА НОВО СЕЛО ОБЈАВИ: ГО ИМАМЕ ПРВИОТ РЕГИСТРИРАН СЛУЧАЈ НА ЗАБОЛЕНА ЛИЧНОСТ ОД КОВИД-19, ОСТАНУВАМЕ ВО СЛУЖБА НА ГРАЃАНИТЕ ЗА ЗАШТИТА НА ЈАВНОТО ЗДРАВЈЕ!

април 9, 2020

Почитувани граѓани,

За жал, вирусот кој во моментот владее со целиот свет не ја одмина Општина Ново Село, и го имаме првиот регистриран случај на заболена личност од Covid-19 во општината. Оваа информација не треба да биде причина за паника, меѓутоа треба да биде апел сите строго да се придржуваат кон мерките и да покажат одговорност во заштита на јавното здравје.

Градоначалникот на Општина Ново Село Г-дин Никола Андонов и Кризниот штаб при Општина Ново Село упатуваат апел до сите граѓани, а особено до младите, да покажат поголема одговорност и да ги почитуваат сите мерки за заштита од коронавирусот Covid-19.

Во последните неколку денови се забележани поголеми групирања на граѓани пред различни институции, маркети и ресторани.

Ве потсетуваме дека сите граѓани треба да се движат на соодветно растојание од два метри, да практикуваат лична и респираторна хигиена, да не ги напуштаат своите домови без поголема потреба и строго да се придржуваат кон ограничувањата за движење според возрасните групи.

Со Одлука на Влада е забрането движењето на граѓаните на јавни места и јавни површини во групи поголеми од две лица, при што дозволено е родител да биде во поголема група со своите деца до 14 години.

Земајќи ја во предвид актуелната состојба, сите заедно треба да покажеме поголема одговорност во почитување на сите мерки, и да им ја олесниме работата на сите оние кои непречено работат за заштита на нашето колективно здравје.

Општината и надлежните институции и понатаму ќе се фокусираат на спроведување на потребните мерки, и ќе останат во служба на граѓаните за заштита на јавното здравје.

Здравјето, пред сè!

Споделете ја оваа вест доколку ви се допадна:

НАЈНОВИ ВЕСТИ