Екипата на МЗТ Скопје Аеродром го освои трофејот во Македонскиот кошаркарски куп, откако триумфираше синоќа во СРЦ „Кале“ над градскиот ривал Работнички со 77:69.

МЗТ Скопје фуриозно го започна 28. финале во кошаркарскиот Куп, кој од годинава го носи името „Благоја Георгиевски – Буштур“, и откако ја реши во своја корист првата четвртина со 23:12 замина полувреме со предност од плус девет поени (37:28).

Работнички на стартот на последната четвртина стигна на минус четири (51:55) и го донесе финалето во неизвесна завршница, но, на крајот немаше сили за целосен резултатски пресврт.

Струмичанецот Васко Атанасов кој е и тренер на МЗТ СКОПЈЕ за Струмица Денес изјави дека е пресреќен што неговата екипа во еден ваков исклучително тежок натпревар на крајот успеа да слави.

„Беше тешко уште од самиот старт. Имавме и падови во играта, но како велат постарите, крајот го краси делото. Пресреќен сум шо успеавме во зацртаната цел“.

За МЗТ Скопје Аеродром ова е десетти трофеј во 14. Куп финале со што се израмни по бројот на пехари со вечниот ривал Работнички, кој загуби во своето 16. финале.