Заврши пријавувањето  и теренската проценка на штетите од невремето кое на 7 овој месец  зафати дел од струмичкиот  регион. До општинската комисија за проценка на штети пристигнале 358 барања .  Освен пет кои се однесуваат на градежни објекти,  сите останати  барања се за штети предизвикани во земјоделието. Најголемиот дел од барањата се од селото Муртино кое беше и најпогодено од невремето проследено со град и силен ветер.

,, Најмногу барања за проценка и утврдување на штети има од Муртино и тоа 244, имаме 61 барање од Сачево, 44 од Дабиле и околу десетина од останатите населени места во општина Струмица.,, вели Ацо Ѓоргиев, претседател на комисија за проценка на штети во општина Струмица.

Според пријавите од земјоделците најпогодена била пиперката и тоа ајварката засадена на површините на отворено.

,, Штетите најмногу се однесуваат на посадени површини под индустриска пиперка и тоа на отворено.  Имаме делумно уништени или оштетени фолии, односно пластеници со оштетено , уништено посадено производство. Имаме делумно штета на пченка, пченица и други култури на отворено.,, вели Ѓорѓиев

По електронската обработка на податоците и деталната проценка на секоја пријавена парцела ќе се знае и точната висина на штетата која беше предизвикана од невремето. Веднаш потоа ќе следува изработката на елаборатот кој треба да се достави  до советот на општина Струмица на усвојување, а  потоа истиот ќе биде испратен до надлежните институции и владата која треба да одлучи за конечното обештетување.